Йозеф Тисо

See More

Йозеф Тисо
Jozef Tiso
Президент 1. Словацкой республикы
Во функции:
26. октобер 1939 — апрѣль 1945
Предходник	пост новоствореный
Наступник	пост скасованый
1. Премьер Словацкой републикы
Во функции:
14. марец 1939 — 26. октобер 1939
Предходник	пост новоствореный
Наступник	Войтех Тука
Уродив ся	13. октобер 1887 Велька Битча, Австро-Мадярщина
Умер	18. апрѣль 1947 Братислава, Чехословакия
Alma mater	Пазманеум
Едукация	доктор теологии, 1911
Народность	Словак
Политична партия	Словацка народна партия
Профессия	священик, теолог, политик
Вѣра	римокатолик
Подпис

Йозеф Тисо з визитов у А. Гитлера, 1941

Йо́зеф Ти́со (слов. Jozef Tiso, * 13. октобер 1887, Велька Битча, жупа Тренчин, Мадярске кральовство, днесь Битча, Словакия – † 18. апрѣль 1947, Братислава) — словацкый римокатолицкый священик, теолог и политик, 1. президент Словацкой републикы (1939–1945).

Молоды рокы и наука

Родив ся в фамилии мясаря Гашпара Тиса яко другый дѣтвак з десятерох, быв крещеный яко Йозеф-Гашпар, але друге имя не хосновав. Уже в зачаточной школѣ в Битчи освоив основы нѣмецкого и мадярского языка. Як способного ку языкам послали го на гимназию до Жилины (1898), пак до Нѣтры (1902), одкы го нѣтрянскый бискуп, як вызначно способного послав до Пазманеума во Вѣдень, де по науцѣ (1906–1910) року 1911 зыскав ступѣнь доктора теологии. Од року 1910 служив священником, а в часѣ 1. Свѣтовой войны фелдкуратом (военскым священником), але в конци рока 1914 тяжко похворѣв ся и быв вывольненый од войска. Доставать роботу профессора теологиии в Нѣтрѣ, а року 1921, в барз молодом вѣку, ставать ся секретарем нѣтрянского бискупа.

Политична карьера

Уже од року 1910 бере участь в политичных партиях, а року 1918 доставать ся до гремия Словацкой народной партии, яка выступала за автономию Словакии. Року 1925 выбраный за посланця парламента и зоставать ним до року 1939. Року 1927 партия добивать ся до влады и Йозеф Тисо наступать на пост Министра здоровництва и физкултуры. Року 1930 ставать ся подпредсѣдником партии, а по смерти предсѣдника Андрея Глинкы — везирьом партии (1939).

Перва Словацка република

По Мниховской догодѣ (30. септембер 1938) Нѣмцѣ обсадили Судеты, а президент Чехословакии Едвард Бенеш вздав ся свого уряду и емигровав. В Жилинѣ представителѣ словацкых партий такой выголосили автономию Словакии (6. октобер 1938). В тяжкой ситуации парламент в Празѣ мусѣв нараз тоту автономию легислативно утвердити, а президент Емил Гаха именовав Йозефа Тиса премьером автономной Словакии. Подля Мниховской догоды Чехословакия мусѣла за три мѣсяцѣ рѣшити проблемы польской и мадярской меншины, што было майже неможне. Понеже Мниховска догода не дозволяла Гитлеру военным способом забирати далшы части Чехословакии, робив крокы ку тому, обы ся Чехословакия роспала сама по собѣ: про то добивав ся выголошѣня самостойности Словакии и таксамо Подкарпатской Руси, котры хотѣв зробити своима сателлитами. При грозячом выголошѣню самостойности Словакии президент Гаха одволав Тиса з функции и выголосив на территории Словакии штатарию (9. марец 1939), заведены з Чехии военскы едноткы зачали обсаджовати стратегичны объекты. Уже збавеный функции Тисо прияв позваня Гитлера до Берлина на 13. марца, на котром Гитлер домогав ся неодкладного выголошѣня независимости Словакии. Тисо собѣ лем только выпросив, жебы тот вопрос поставив на рѣшѣня словацкого сойма. На другый день словацкый сойм выголосив независимость (14. марец 1939). О атмосферѣ того акту добрѣ свѣдчить споминка посланця Павла Чарногурского: "…по отворѣню сойма на посланецкы лавицѣ упав тяжкый, дусячый настрой… Каждый з нас розумѣв, же выголошѣньем независимости словацкой державы станеме ся лем инструментом в руках Гитлера, а не проводниками волѣ народа.

В оригиналѣ …otvorením snemu sa zniesla na poslanecké lavice ťažká, až dusivá nálada… Každý z nás vedel, že vyhlásením slovenskej štátnej samostatnosti sa staneme len nástrojom Hitlera, nie vyjadrovateľmi vôle národa.

Подобный сценарий реализовали и на Подкарпатской Руси. Чехословакия перестала екзистовати. Тисо быв винный за депортацию Жидох Словакии до концентрачных лагрох. Тото не сперечав ани на судѣ, бо поважовав их за шкодникох словацкого люду. Выступаючи на дожинках в Голичу 16. августа 1942 повѣв: „Зробили сьме то на росказ Божый: Словак, зошмарь, збав ся свого шкодника!“

Конець карьеры

В апрѣлю 1945 по приходѣ Червеной Армады Тисо утѣк до Австрии, де быв арештованый еднотков америцкого войска и выданый Чехословакии. Быв обжалованый зо зрады отечества и злочинов против людскости. Суд над ним зачав ся 2. децембра 1946 и закончив ся 15. апрѣля 1947. Быв засудженый на смерть завѣшеньем. Екзекуция одбыла ся 18. апрѣля 1947 на дворѣ Юстичного палаца в Братиславѣ. Неодовго быв в тайности похованый на Мартинском цинтерю в Братиславѣ.

Шацунок его особности и чинох в словацкой и заграничной историогрфии противоречивый. Як идеолог, политик, державный и духовный дѣятель в тяжкой ситуации добы 2. свѣтовой войны,мимо дакотрых уступок нѣмецьому натиску и наслѣдным з того хыбам, причинив ся до збереженя териториалной и нородностной цѣлости штату, захранив живот вельом людям, духовны и материалны вартости словацкого народа.

— Slovenský biografický slovník

В оригиналѣ Hodnotenie jeho osobnosti a činov je v slovenskej a zahraničnej historiografii protirečivé. Ako ideológ, politik, štátnik i duchovný činiteľ v zložitej vnútropolitickej a medzinárodnej situácii v období 2. svetovej vojny, napriek niektorým ústupkom vynúteným mocenským vplyvom Nemeckej ríše a z toho vyplývajúcim chybným rozhodnutiam, pričinil sa o zachovanie národnej a územnej integrity Slovenska, o záchranu mnohých životov a o rozvoj duchovných i materiálnych hodnôt slovenského národa. Slovenský biografický slovník

Хоть еще и днесь многы в Словакии и заграничу видять в нем жертву трагичных обстоянь, свѣт оцѣнять его особу еднозначно.

Одказы

• Slovenský biografický slovník. VI T – Ž. Martin: Matica slovenská. 1994. pp. 74-76. ISBN 80-7090-111-X. 
• Slováci útočia na Sovietsky zväz (видео)