Fyrstu blóðroyndirnar tiknar

So er FarGen av álvara í gongd, og fyrstu luttakararnir hava latið blóðroynd til verkætlanina. Hetta hendi á kunningartiltakinum, FarGen á ferð, sum varð hildið í Klaksvík í gjárkvøldið.

Eini 30 fólk vóru á fundi, og undirtøkan at tekna seg var góð. Fyrstur at bjóða seg fram til blóðtøku, var Kári Vitalis, sum skemtandi undraðist á, at blóðið í hansara æðrum vísti seg at vera reytt - og ikki blátt. Samstundis legði hann myndakvinnuni eina við, um at fáa bláa KÍ-jakkan við á myndina.

Hildið verður fram við kunningartiltakinum, FarGen á ferð, og næsti steðgur verður í skúlanum á Oyrarbakka mikukvøldið 5. okt.